Korrika martxoaren 29an helduko da Zorrotzara

ZORROTZ MORROTZ

Aurtengo Korrika ekimenaren azken egunean, martxoaren 29an, sartuko da Zorrotzan. Korrika 07:22an sartuko da Bilbora, Enekuritik. Zorrotzara Altamiratik helduko da, 8:30ak aldera Zazpi Landatik sartuta. Aldapan behera ibilbide gehiena egin ondoren, eta auzoan zehar 4 kilometro egin ostean. Basurturako bidean agurtuko dugu 8:55ean. 12:00etan aurreikusten da aurtengo lasterketa erraldoi honen azken kilometroa Bilboko Areatzan, eta ondoren, azken eguneko ohiko jaiak Bilboko erdialdeko kaleak hartuko ditu

Metroaren 4. lineako lanak 2027an hasiko dira Errekalden

Obraren bigarren faseak Errekalde eta Enkarterri lotuko ditu, Zorrotzatik igarota, baina azken horrek oraingoz ez du datarik; izan ere, horretarako FEVEren egungo trenbide-azpiegitura baliatuko denez, beharrezkoa da linea hori Eusko Jaurlaritzari transferitzea eta auzoko trenbide-pasaguneak lurperatzea.

AITOR MARÍN

Azkenik, eta urte luzeetako promesen ondoren, Zorrotza izena Metro Bilbaoren mapa batean agertu da 4. linea izango denaren obrak finanziatzeko akordioaren aurkezpenean, baina Errekaldetik Zorrotzarako tarterako ez da zehaztu inolako gauzatze-datarik.

Eusko Jaurlaritzak eta Bizkaiko Foru Aldundiak joan den abenduaren 5ean aurkeztu zuten metroaren 4. linearen proiektua kofinantzatzeko akordioa. Lehen fasean, lanak 2027an hasiko dira, makinak Errekalden auzoa Moyua plazarekin lotzeko lanak hastearekin batera,  eta Matikoraino iritsiko da.

Baina metroa Zorrotzara iristeko gehiago itxaron beharko da. Obren bigarren faseak, Errekalde eta Alonsotegi artekoak, oraindik ez du hasteko datarik. Egungo FEVEren trenbideak baliatuko dira, eta azpiegitura hori Eusko Jaurlaritzari transferitzeko beharraz gain, aldez aurretik ADIFi dagokion Zorrotzako trenbide-pasaguneen lurperatzea ere bukatu beharko da. Eusko Jaurlaritzak eta Bizkaiko Foru Aldundiak konpromisoa hartu dute kudeaketa hori aurrera eraman dadin izapide guztiak egiteko. Horretarako, Eusko Jaurlaritzak kudeaketa-gomendio bat eskatuko dio Estatuan trenbide-azpiegitura eraikitzeko ardura duen erakunde publikoari. Horrek esan nahi du Eusko Jaurlaritzak lan horiek garatu ahalko dituela Espainiako Gobernuak egin arte itxaron gabe. Proiektatutako Bilbao Metroko 4. linea berria Alonsotegiko Irauregi auzoraino iritsiko litzateke, eta geralekuak izango lituzke Kastrexanan eta Santa Agedan, Zorrotza baino lehen; eta, ondoren, Errekalderaino iritsiko litzateke, lehenago Basurtun geldituta. Errekaldetik, obraren lehen zatia bukatu ondoren, linea berriak geltokiak izango ditu Iralan, Zabalburun, Moyuan, Casilda Iturrizar parkean, Deustun eta Matikon, eta 3. linearekin lotuko da. Azken hori eta Usansolorako 5. linea bezala, Euskotrenek kudeatuko du 4. linea berria. Jaurlaritzak kostuaren % 55 ordainduko du, eta Aldundiak gainerako % 45a. Lanen lehen zati honetarako aurreikusitako inbertsioa 412 milioi eurokoa da, baina litekeena da kopuru hori eguneratu egin beharra behin betiko eraikuntza-proiektuen arabera.

Sader Zierbenara lekualdatuko dela berretsi du Jaurlaritzak

Mikel Jauregi Industria sailburuak esan du lekualdaketa izapidetzen ari dela, eta urte honen hasieran ebatziko dela aurreikusi du.

«Sader enpresa Zierbenako portu-instalazioetara lekualdatzea izapidetzen ari da, eta 2026. urtearen hasieran ebaztea aurreikusten da». Mikel Jauregi Industria, Trantsizio Energetiko eta Jasangarritasuneko sailburuak Eusko Legebiltzarraren abenduaren 19ko bilkuran esandako hitzak dira. Sailburua horrela mintzo zen Jon Hernández Sumarreko legebiltzarkideak erregistratutako interpelazio bati erantzuteko. Bertan, Eusko Jaurlaritzak Sader eta Profersarekin duen «permisibitate onartezina» salatu zuen Sumar taldeko kideak, eta bi enpresa horien jarduera Zorrotzan eta inguruko auzoetan bizi diren milaka pertsonaren «osasun publikorako eta segurtasunerako arrisku nabarmena» dela ohartarazi zuen. Hernandezek, bere hitzaldian, Sader Profersa Kanpora! plataformaren bidez auzo-mugimenduak adierazitako ondoeza jaso zuen, Eusko Jaurlaritzak Sader enpresan Ingurumen Baimen Integratua aldatzeko baimena eman ondoren. Baimen horri esker, hondakin arriskutsuen % 38 gehiago tratatzeko aukera dauka enpresak.

Ez du hala uste, ordea, sailburuak: Jauregik ziurtatu zuenez, tratatu beharreko materialaren kopurua hazi arren, «horrek ez du esan nahi ingurumenari eragiten dion kaltea edo biztanle egoiliarrentzako arriskua handituko denik». Jauregiren arabera, hazkunde horrek «batez ere lohi-lerroari eragiten dio, eta bertako hondakin-urak behar bezala tratatzen dira». Gainera, sailburuak lasaitasuna helarazi nahi izan zion lekualdaketa horrekin kezkatuta dagoen jendeari, eta ziurtatu du «instalazio berria modernoagoa eta eraginkorragoa» izango dela, «eskura dauden hobekuntza tekniko guztiak txertatuta, bizilagunentzat eta ingurune hurbilean ingurumen-inpaktua ahalik eta txikiena izateko».

Desokupazio-enpresa bat bizilagun bat ilegalki etxegabetzen saiatu izana salatu dute

ZORROTZ MORROTZ

Desokupazio enpresa batek Zorrotza-Kastrexana kaleko bizilagun bat mehatxatu duela salatu du Zorrotza Antifaxista izeneko auzotar taldeak argitaratutako kartel baten bidez. Era berean, berriro ere  ilegalki etxegabetzen saiatuko dela ohartarazi dute. Ale hau ixteko unean, ez dago informazio gehiagorik, baina Zorrotza Antifaxistak horren harira egin litezkeen deialdietara adi egoteko eta desokupazio enpresako norbait ikusiz gero Etxebizitza Sindikatura deitzeko eskatu du

Aurtengo Bilboko Zirkuitoaren programako bi antzezlan jasoko ditu Zorrotzako Udaltegiak

ZORROTZ MORROTZ

Udalak “Bilboko Zirkuitua” programaren beste edizio bat jarri  du martxan, eta urtarriletik maiatzera, herriko eszena bultzatzeko, hainbat auzotan banatutako hamabost antzerki proposamen eskainiko dira. Horietatik bakarra izango da euskaraz, otsailaren 26an Begoña Udaltegian.

Zorrotzan jasoko ditugun bi proposamenetako lehena, Pasmi Teatro taldearen “Pareja abierta” izango da, urtarrilaren 29an. Obra honek, tonu satirikoan, zalantzan jartzen du gaur egun generoen eta bikote-harremanen inguruan nagusi den moral bikoitza. Iván Iparraguirrek zuzendutako pieza hau, pasarte komikoz eta egoera zoroz beteta dago.

Maiatzaren 7an, berriz, Companya del Bac  taldearen txanda izango da, “El recital: La palabra contra el olvido” proposamenarekin. Musikaz lagundutako poesia-errezitaldi honetan, bizia emango zaie hainbat poetaren obrari, hala nola Lorca, Aresti, edota Blanca Sarasua. Bizia eta emozioa ahanzturari aurre egiteko.

Saioetan sartzeko ordubete lehenago jaso behar dira sarrerak, emanaldi bakoitzaren egunean bertan (18:00etan), antzezpenaren leku berean.

Hiltegi zaharrean izandako sute batek kalte handiak eragin ditu eraikineaneta bertako hainbat enpresatan

Abenduaren 1ean izandako sutean eraikinak eta bertako hainbat enpresak kalte larriak jasan zituzten. Azken asteotako euriteek eta haizeteek egoera are gehiago okertu dute, teilatuaren hainbat zati kolapsatu eta erori ondoren.

ZORROTZ MORROTZ

Sute handia piztu zen Zorrotzako hiltegi zaharrean joan den abenduaren 1ean, goizaldeko hirurak inguruan. Suak ke eta su zutabe handiak eragin zituen, eta horrek inguruko bizilagunen artean kezka sortu zuen. Larrialdi zerbitzuak berehala bertaratu ziren eta suhiltzaileek hainbat ordu behar izan zituzten sutea mendean hartzeko.

Sutea piztu zen eraikinean lau pertsona zeuden lo, gaur egun erabilerarik gabe dagoen pabiloi batean. Segurtasun-indarrek eta suhiltzaileek pertsona horiek garaiz ebakuatu zituzten, eta ez zen zauriturik izan. Hala ere, eraikinak kalte handiak jasan zituen eta bertan zeuden hainbat enpresaren jarduera ere kaltetuak izan ziren. Iturri ofizialen arabera, pabiloiaren barruan eta inguruan kokatutako tailer eta biltegi batzuek kalte material handiak izan zituzten, batez ere keak, suak eta urak eraginda. Zenbait enpresatan makineria, materiala eta ibilgailuak hondatuta geratu ziren.

Uneko lehen balorazioen arabera, kalte ekonomikoak handiak izan daitezke, zenbaki zehatzik eman ez arren. Enpresa batzuek hilabeteak beharko dituzte jarduera berriz martxan jartzeko. Iturri enpresarial batzuen arabera, galerak ehunka mila eurokoak izan daitezke, batez ere, ekipamendu espezializatua galdu dutenen  kasuan.

Momentuz, ez da argitu sutea zerk eragin zuen. Iturri ofizialek adierazi zutenez, ezin da baztertu hainbat hipotesi, kausa zehatzik baieztatu gabe.

Azken asteotako euriteek eta haize-boladek teilatua erortzea eragin dute eraikineko hainbat gunetan

Azken asteotan, gainera, gurean izandako eurite handiek eta haizeteek are gehiago okertu dute eraikinaren egoera. Eguraldi txarraren ondorioz, argazkian ikus daitekeenez, teilatuaren hainbat zati kolapsatu eta erori egin dira, suteak jada oso ahulduta utzitako egituretan.

ALDAKETAK BILBOBUS ZERBITZUAN: 85 linearen maiztasuna 15 minutura handituko da; 18ak eta 88ak, berriz,  ibilbidea aldatuko dute, eta Intermodaletik igaroko dira

Bilboko Udalak Bilbobusen zerbitzua berrantolatzeko proposamen bat aurkeztu die alderdi politikoei eta auzo-elkarteei, aldaketak ezarri aurretik hilabeteko epean alegazioak aurkezteko aukera izan dezaten.

Auzo Elkarteak urteko batzar orokorra baliatu du proposamen horiek aurkeztu eta ekarpenak jasotzeko.

AITOR MARÍN

Bilboko Udalak, Mugikortasun eta Jasangarritasun Sailaren bidez, Bilbobusen zerbitzua berrantolatzeko proposamena aurkeztu du zerbitzua indartzeko asmoz. Proposamen hori “azterlan sakon batean oinarritu da”, eta hainbat herritar-elkartek, ordezkari politikok, teknikarik, zerbitzuko operadorek eta erabiltzailek parte hartu dute prozesuan. Eragile hauek guztiek hilabeteko epea dute proiektua berriro aztertzeko eta  proposamen edo hobekuntzak aurkezteko.

Proposamen berriak aldaketak eragingo lituzke Zorrotzatik pasatzen diren 3 lineetan. 18 eta 88 lineen maiztasuna bere horretan geratuko da, baina ibilbidean aldaketak izango dira. 85 linea, berriz, indartu egingo da:  zerbitzuaren maiztasuna 15 minutukoa izango da eta ibilbidea Mirafloreseraino luzatuko da.

85. lerroa indartuko da

85a maiztasuna handituko duen zazpi lerroetako bat da. Gaur egun, autobusak hogei minutuan behin ateratzen dira Zazpi Landatik; aldaketak indarrean sartzen direnean, hamabost minutuan behin aterako dira. Gainera, ibilbidea Atxurin amaitu beharrean, Mirafloreseraino helduko da.

Aldaketak 18 eta 88ko ibilbidean

18ak eta 88ak hogei minutuko eta ordubeteko maiztasunari eutsiko diote, hurrenez hurren, baina proposamenak aldaketa garrantzitsuak ekarriko ditu ibilbidean. 18a Autonomia kaletik igaro beharrean, Basurtuko ospitaletik igaro ondoren, Gurtubay kaletik abiatuko da Intermodalerantz. Jesusen Bihotza eta Kale Nagusitik igarota, Moyua plaza inguruan, Elkano kaleko egungo ibilbidea berreskuratuko luke, aldaketak indarrean sartzen badira. Itzulerako ibilbideak ere antzeko aldaketak jasango lituzke: Moyua plazatik igarota, Jesusen Bihotzeraino iritsiko litzateke Kale Nagusitik, eta, ondoren, Sabino Arana etorbidetik jarraituko luke, aurrerago, Montebideo etorbideko egungo ibilbidearekin bat egin arte.

Antzeko zerbait gertatuko litzateke 88 linearekin. Gaur egun, Gurtubay kaletik egiten duen ibilbidetik desbideratuko litzateke Egia Jeneralaren kaletik. Sabino Arana kaletik jarraitu ondoren, Indautxu plazaraino iritsiko litzateke Simon Bolivar kaletik. Itzulerako ibilbidea Urkixo Zumarkaletik egingo luke, eta San Mamesetik oso gertu, Basurtuko ospitalearen ondotik, Gurtubay kaletik, egungo ibilbidearekin bat egingo luke Montebideo etorbidean.

Indarrean sartzeko eperik gabe

Udaleko arduradunek ez dute adierazi nahi izan aldaketa horiek egiteko eperik. Izan ere, “aldaketa horiek geltoki berriak, markesinak eta abar dakartzate,  eta horrek guztiak hiria prestatzea eskatzen du.”

Auzo Elkarteak azaroaren 19ko bere urteko batzar orokorra baliatu zuen proposamen hau bizilagunei aurkezteko eta haien iritziak biltzeko, Udalak ekarpen berriak jasotzeko emandako hilabeteko epearen barruan herritarren kezkak eta iritziak aurkeztu ahal izateko.

Balizko aldaketa honen ondorioz, linea kopurua 37tik 39ra gehituko litzateke eta geltokiak 527tik 541era areagotuko lirateke. Zerbitzuak inoiz aldaketa puntualen bat jasan badu ere, 1988an Bilbobusen zerbitzua sortu zenetik izan den berrantolaketarik asmo handiena da hau.

Bertsoak, magia eta antzerkia Euskararen Eguna ospatzeko

ZORROTZ MORROTZ

Zorrotzako elkarte euskaltzaleek kultur egitarau zabala antolatu dute 2025eko Euskararen Eguna ospatzeko. Zalantzarik gabe, ekitaldi nagusia Euskal Txokoak urtero antolatzen duen ohiko bertso afaria izango da. Aurten ere Arrigorri jatetxean egingo da, azaroaren 28an, ostirala, eta bertsozaleak asebeteko dituzten menuak eskainiko dira. Izan ere, afariko menuaz gain, zeresan handiena emango duena Sustrai Colina eta Maddalen Arzallus mailako bertsolariak entzuteko aukera izango da. Iparraldeko bi bertsolariekin batera, Arkaitz Estiballes -bere garaian Bizkaiko txapelduna- gai-jartzaile arituko da. Maila handiko kartela, zalantzarik gabe.

Hurrengo egunean, azaroaren 29an, larunbata, eta Askabide Kultur Elkarteak antolatuta, Auzokan txikiek magia ikasteko aukera izango dute goizean zehar, 2025eko magia sari nazionala izan den Hodei magoaren eskutik, baina ez nolanahi: material guztia fabrikatuta eta prestatuta eramango dute, benetako magia antzeztu ahal izateko. Geroago, 13:00etan eta berriro ere Auzokan,  Hodei magoak berak  “%100 Hodei” famili ikuskizuna egingo du. Magia, umorea eta dibertsioa ez dira faltako publiko guztientzat. Dena doakoa izango da; hala ere, tailerrerako izena eman behar da kunkunelkartea@gmail.com helbidean, plaza mugatuak baitira.

Ospakizunari amaiera emateko, hainbat egun geroago, abenduaren 12an, ostirala, Iholdi Beristainek “Ni eta Nitarrak” antzezlana eskainiko du Biritxi tabernan. Lanak eguneroko egoerak umorearen ikuspegitik jorratzen ditu, eta protagonista euskal identitatearen, heldutasunaren eta maitasunaren arteko oreka bilatzen ari den bitartean bizi dituen dilema eta erronketan murgilduko du ikuslea. Ikuskizunerako sarrera doakoa izango da.

Sader Profersari baimen gehiagorik ez ematea eskatu du beste mobilizazio batek

Babestu beharko gintuzketenengandik “defraudatuta, abandonatuta eta traizionatuta” sentitzen dira kaltetutako bizilagunak. Mobilizazioak hasi zirenean, Saderrek urtean 86.000 tona hondakin arriskutsu tratatzen zituen; orain, Eusko Jaurlaritzaren baimen berrien ondorioz, 118.000 tona baino gehiago tratatuko ditu

AITOR MARÍN

Azaroaren 14an, Sader eta Profersaren lekualdaketa eskatzeko eta Udalari zein Jaurlaritzari, enpresei baimen berriak eman beharrean, lekualdaketa hori ahalbidetzeko benetako inplikazioa eskatzeko manifestazioak 1.200 lagun inguru bildu zituen. Sader Profersa Kanpora! plataformak antolatutako mobilizazioa Bilboko Eusko Jaurlaritzaren ordezkaritzatik atera eta Zorrotzaurren, Sader eta Profersaren aurrean, bukatu zen.

Plataformaren bozeramaileek adierazi zuten “defraudatuta, abandonatuta eta traizionatuta” sentitzen direla, “babestu beharko gintuzketenen aldetik”. Gogorarazi zuten bi istripu kimiko gertatu  eta hainbat mobilizazio egin arren, “ez dela ikusten erakundeen borondaterik egoera konpontzeko”. Izan ere, plataformak mobilizazioak hasi zituenean, Saderrek 86.000 tona hondakin arriskutsu tratatzen zituen urtean; baina, baimen berriari esker, orain 118.000 tona baino gehiago izango dira. “Hondakin gehiago, arrisku gehiago”, ohartarazi zuten bozeramaileek.

Mugimenduak haserrea azaldu zuen Bilboko erdigunean dauden instalazioetan industria-hondakinen tratamendua %38 handitzeko Eusko Jaurlaritzak Saderri “isilean” eman dion baimenagatik. 2024ko urrian hedabideen bidez handitze horren berri izan zutenean, uste zuten etorkizunean herriguneetatik urrun egingo zen planta berri baterako izango zela. Baina martxoan, Zorrotzan dagoen egungo lantegirako sinatu zen baimena, “bide azkarretik eta isilean”, funtsezkoa ez den aldaketa gisa aurkeztuta. Horri esker, ez zen aldizkari ofizialetan argitaratu, eta “ez dute jendaurrean azalpenik eman behar izan”.

Inolako bermerik gabe

Era berean, Sader Profersa kanpora! plataformak salatu du hau guztia kutsaduraren hedapenari buruz inolako ikerketarik egin gabe egin dela. “Orain arte Osasun Sailak ez du txosten bat bera ere argitaratu ziurtatzeko lantegi hauek ez diotela kalterik eragiten Bilboko biztanleon osasunari”

Zorrotza-Olabeaga pasealekua berritzeko proposamena 2026ko udal-aurrekontuan sartuko da

Institutuko ikasleek aurkeztuta, aurtengo aurrekontu parte-hartzaileetan boto gehien jaso dituzten 15 proposamenetako bat izan da.

ZORROTZ MORROTZ

Aurrekontu parte-hartzaileen bozketaren emaitzaren arabera, Zorrotzako Institutuko ikasleek aurkeztutako “Zorrotza-Olabeaga pasealekua berritzea” proiektuak, 215.000 eurotan baloratua, 2061 boto lortu ditu. Beraz, prozesu honetatik 2026an gauzatzeko udal-aurrekontuak barne hartuko dituen hamabost proposamenetako bat izango da.

Ikastetxeko ikasleek kurtso hasieran auzoaren beharrizanak aztertu zituzten, eta detektatu zuten beharrizanetariko bat Zorrotza-Olabeaga pasealekuaren berriztapena zela. “Izan ere, Zorrotzatik hasi eta Olabeagara oinez joanez gero, aisaldirako bi eremu aurki daitezke, baina guztiz zaharkituta daude”. Oraingoz ez da azalpen gehiagorik eman proiektu honen inguruan.