Udalak hiru aukera aurkeztu ditu Zorrotzako Muturreko berroneratzean aurrera egiteko
Bilboko udalak hirigintzako izapideak hasi ditu Zorrotzako muturreko hirigintza-antolamenduan aurrera egiteko eta parte hartzeko prozesua ireki du herritarrei aukera ezberdinak azaltzeko.
AITOR MARÍN
Bilboko Udalak Zorrotzako Muturreko Plan Orokorra aldatzeko prozesua abiatu du. Horretarako, hasierako dokumentu estrategikoa aurkeztu du, eta horrekin batera, ingurumen-ebaluazio estrategikoaren izapidea jarri da martxan. Dokumentuak hiru antolamendu aukera planteatzen ditu, eta horiek izango dira otsailean eta martxoan garatzen ari den herritarren parte-hartze prozesuaren oinarria. Prozesu horretan dagoeneko bi informazio-saio burutu dira, Udaltegiko hallean informazio panelak daude ikusgai, eta hainbat bilera eta auzoko ikastetxeetan saioak egiten ari dira.
Lehenengo aukera “Lotura” proiektuak planteatzen zuena da. Antolamendua Ibaizabal eta Kadagua ibaien ertzak lotuko lituzkeen eraztun berde baten inguruan egituratuko litzateke, eta ardatz nagusi batek Zorrotzaurre eta Burtzeña lotuko lituzke. Proposamenak 2.000 etxebizitza inguru aurreikusten ditu, %55 libreak eta %45 babestuak, baita merkataritza eta hirugarren sektorerako 130.000 metro koadro ere.
Bigarren aukerak antzeko oinarria du, baina ardatz nagusian eraikin linealak proposatzen ditu, eta dorre isolatu batzuk hiri-paisaiaren erreferentzia izango lirateke. Etxebizitza kopurua antzekoa litzateke (2.000 inguru), %53 libreak eta %47 babestuak. Kasu honetan, merkataritza eta hirugarren sektorerako 132.000 metro koadro aurreikusten dira.
Hirugarren aukerak jarduera ekonomikoari eta espazio mistoei garrantzi handiagoa ematen die. 1.850 etxebizitza inguru planteatzen ditu (%52 libreak eta %48 babestuak) eta azalera handiagoa gordetzen du jarduera ekonomikoetarako.
RENFEren trenbidea lurperatzea hiru planen elementu komuna da
Hiru proposamenek elementu komun bat dute: RENFEren aldiriko trenbidea lurperatzea. Horrela, gaur egungo hesi fisikoa kendu eta espazio hori parke berriak sortzeko eta Zorrotza Muturra eta Zorrotzaurre lotzeko sarbide berriak egiteko erabiliko litzateke.
Prozesuaren hurrengo urratsa Plan Orokorraren Aldaketa garatzea eta onartzea izango da; ondoren, jendaurrean jarriko da alegazioak aurkezteko. Behin-behinean onartu ondoren, dokumentua azken onarpenerako bidaliko da. Aldi berean, trenbidearen inguruko informazio-azterlana ere izapidetzea aurreikusten da.
Auzo Elkartearen eskariak
Udalak aurkeztutako plan hauek argitara eman ondoren, Zorrotzako auzo-elkarteak eskari multzo bat aurkeztu du proiektua auzoaren epe luzerako beharretara egokitzeko.
Trenbideari dagokionez, elkarteak lurperatzea eta geltokirako bi sarbide jartzea eskatu du: bata Clara Campoamorretik eta bestea Cordelería 11 paretik. Etxebizitzari dagokionez, tipologiak nahastea proposatu dute, itsasadarraren ondoko etxebizitza librearen eta Kadagua aldeko etxebizitza babestuaren arteko bereizketa saihesteko.
Mugikortasunari dagokionez, honako hauek iradokitzen ditu Auzo Elkarteak: porturako tren-trazadura zaharra oinezkoentzako eta bizikletentzako pasealeku gisa mantentzea; Hubetik Burtzeñako zubirako sarbidea hobetzea eta bidegorria Montevideo-Fray Juan biribilgunearekin lotzea. Barakaldorako oinezkoentzako zubi bat eta Zorrotzaurreko beste lotune bat ere proposatu dituzte.
Era berean, Auzo Elkarteak eskatu du Euskal Errotak eraikina zuzkidura-erabileretara bideratzea eta industria-ondareko elementuak kontserbatzea. Aisialdia eta berdeguneei dagokienez, aurreikusitako biztanleriaren hazkundeari erantzuteko, parke handi bat sortzeko beharra nabarmendu da, eta kiroldegian, Kadaguatik gertuko eremuan, estali gabeko igerilekuak eraikitzea.
Hirigintza-marketina ez izateko eskaera
ZMen Bilboko Udal talde potikoengandik jasotako balorazio bakarra EH Bildurena izan da. Koalizio subiranistak zalantzan jarri du planaren iragarpena eta “hirigintza-marketin” hutsean gera ez dadila eskatu du. Gogorarazi du antzeko proiektuak lehen ere iragarri direla baina urteetan geldirik egon direla, eta 2010-2012ko planak ere ez direla gauzatu, eremuan oraindik industria jarduerak daudelako. Horregatik, oraingoan benetako garapena, herritarren parte-hartzea eta lur publikoaren zati handia babes ofizialeko alokairuko etxebizitzetara bideratzea eskatu du.
