Punta Zorrotzan trenbidea integratzeko azterlana lizitatzeko akordio instituzionala sinatu da, FEVE lurperatzeko lanak egiteke dauden bitartean

ZORROTZ MORROTZ

Garraio Ministerioak, Adifek eta Bilbao Ría 2000k protokolo bat sinatu zuten joan den ekainaren amaieran, trenbidea Zorrotzako lurmuturrean sartzeari buruzko bideragarritasun- eta errentagarritasun-azterlan bat enkargatzeko. Auzoko eremu hori hirigintzaren aldetik eraldatzeko aldez aurreko beharrezko urratsa da hau. Azterlana 420.000 euroan lizitatuko da, eta 12 hilabeteko epea izango du gauzatzeko. Ondoren, informazio-azterlanarekin eta Hiri Antolamenduko Plan Orokorraren aldaketarekin aurrera egiteko aukera emango du.

Proiektuak 320.000 metro koadro garatzea aurreikusten du, bizitegi-erabilera eta erabilera ekonomiko berriekin. Jarduketa honek auzoaren kohesioa hobetzea ere aurreikusten du, eta baita  trenbideek sortzen dituzten oztopoak murriztea eta itsasadarrarekiko harremana baliatzea ere. Juan Mari Aburto alkatearen hitzetan, “Bilboko hedapen-eremu berri honen hiri-eraldaketa abian da”.

Hala ere, Renferen trenbidea lurperatzeko urratsak ematen diren bitartean, FEVE trenbidea lurperatzeko lanek hasteke jarraitzen dute. Informazio-azterlana 2024an onartu bazen ere, eta obrek 55 milioi euroko balioa badute ere, oraindik ez dago hasiera-datarik, eraikuntza-proiektua idaztea eta onartzea falta baita.