NACHO SANTANA PULIDO

«Asko motibatzen nau euskara ikasteak. Oso aberasgarria da adibidez abestiak ulertzea»

JAIOTOKIA: Pozo Izquierdo (Kanaria Handia)

NOIZTIK: 2018tik

ADINA: 46 urte

LANBIDEA: Erlijio eta historia Irakaslea

TESTUA ETA ARGAZKIAK: NAROA PEÑA

Nolatan eta zergatik etorri zinen?

Nire bikotekidearekin hamabi urte daramatzat, eta lehen urteetan bananduta bizi ginen, bera Zorrotzan, eta ni Kanaria Handian. Baina 2018ko udan erabaki genuen ni hona etorriko nintzela behin betiko bizitzera.

Gogorra egin zitzaizun bizi ohituetara moldatzea?

Nire bikotekidearekin hainbeste urte eman nituenez, eta maiz etortzen nintzenez, ba auzoa, jendea, eguraldia eta abar ongi ezagutzen nituen. Beraz, ez zitzaidan zaila egin.

Zure herrian zein lanbide zeneukan?

Hemen dudan bera. Berez, lanik gabe etorri nintzen Zorrotzara bizitzera; baina curriculuma aurkeztu nuen hainbat lekutan  eta azkar aurkitu nuen irakasle lana, DBH eta Batxilergoko institutu batean.

Oso ezberdina da hango bizimodua edo auzokoa bezalakoa da?

Ezberdina da, bai… Kanaria Handian erritmoa motelagoa da oro har, are gehiago, ni bizi nintzen herrian. Bizitza bareagoa da han. Nahiz eta Zorrotza Bilboko hirigunearen kanpoaldean dagoen auzoa izan, jendea leku guztietara joaten da korrika… Elikadura zein adierazteko modua ere desberdinak dira, baina erraza da egokitzea.

Kanaria Handian erritmoa motelagoa da oro har. Hemen hirigunean egon ez arren, jendea leku guztietara doa korrika

Zer da Zorrotzan gehien gustatzen duzuna? Eta gutxien?

Udan dagoen eguraldia gustatzen zait. Hemen ez dut beroak jota egotearen sentsazioa, eta gauez ondo egin daiteke lo. Gainera, asko gustatzen zait kaletik ibiltzea eta auzoko jendea agurtzea eta hemen bizi den hurbiltasuna izatea. Trafiko-mugimendua handia da, berriz,  gutxien gustatzen zaidana. Oso herri lasai batetik natorrenez, ikaragarri nabaritzen dut hori.

Zure herriko zeren falta duzu gehienbat?

Familia eta lagunena, batez ere. Kontaktua dut, baina ez da gauza bera lehen neukanaren aldean.

Zure herrira askotan bueltatzen zara?

Egun bi urte dituen alaba jaio baino lehen, hilero bueltatzen nintzen. Orain, oporretan baino ez: Aste Santuan, udan eta Gabonetan.

Zelan moldatzen zara euskararekin. Euskara ikasi duzu?

2018. urtetik daramat Euskara ikasten. Astegunero bi ordu. Hasieran, azkar ulertu eta ikasten nuen dena; baina, gaur egun, B2 titulua prestatzen ari naiz eta zailtasunak gora egin duela nabaritzen da… Dena den, motibatzen nau euskara ikasteak; ez bakarrik titulua behar dudalako; baita, adibidez, abesti bat entzutean, esaten duena ulertzea oso aberasgarria delako ere.

Eta bukatzeko, Zure herrira berriro bizitzera bueltatzeko asmoa izan duzu edo Zorrotzan betiko geratzeko erabakia duzu?

Hemen bizi gara, gure alabarekin. Orain ez dut imajinatzen hango bizimodua. Oporretan edo denboraldi luzeagoren batean joango gara, baina gure bizitza hemen dago.