LEIRE PEÑA AGIRRE

“Hemen benetako independentzia izateko aukera izan dut”

Bizitokia: Dublin, (Irlanda)

Noiztik: 2024ko apiriletik 

Adina: 26 urte

Lanbidea: Haur hezitzailea.

Lanean egonkortasun eskasak behartuta, aukera gehiagoren bila lan eskaintza baten bitartez heldu zen Leire Dublinera. Bertan jende eta inguru jatorra topatuta eroso dagoen arren, argi dauka Irlandako etapa hau bukatzen denean, gurera bueltatuko dela, auzoa eta Euskal Herria bihotzean daramatzalako

TESTUA:  NAROA PEÑA.

Nolatan heldu zinen hara bizitzera?

Auzoan aldi baterako lanetan eta egonkortasun eskasarekin lanean egonda eta hezitzaileon lan egoera dela eta, nire burua internazionalki aukera gehiagotara irekitzea erabaki nuen. Gainera, nire erosotasun-eremutik irteteko momentua zela sentitzen nuen, baita ingelesa hobetzeko aukera ona zela ere… Finlandiako eta Alemaniako haurtzaindegi pare batekin ere harremanetan ibili nintzen; baina, azkenean, Irlandako lan eskaintza hartzea eta hona etortzea erabaki nuen.

Nolakoa da zure lana?

Nabilen ‘haurtzaindegian’ (hemen ‘creche’ deitzen dira) 1 eta 5 urte bitarteko haurrak ditugu, 8 taldetan banatuta. Oraintxe bertan, 2-3 urte bitarteko haurrekin nabil lanean, nire gela finkoa dut eta bertan 12 haur ditugu Pablok eta biok. Espainiar estatuaren aldean, Irlandako ratioa askoz txikiagoa da; nire adinekoekin, adibidez, 6 haur irakaslekoa da. Horrek haur bakoitzari behar duen arreta eskaintzea erabat errazten du, baita lana behar bezala egitea eta gozatzea ere.

Bizimodu berrira moldatzea kostatu zitzaizun?

Ba, egia esan, uste nuen baino askoz gutxiago kostatu zitzaidan. Egia da lehenengo asteetan nire burua kokatzea eta bertako bizimodura moldatzea erronka izan zela, atzerrian eta nire familia eta lagunengandik urrun bizi nintzen lehen aldia baitzen. Hala ere, zorionez, bai lanean bai sozialki jende eta inguru jatorra aurkitu nuen, eta orain erabat eroso nago hemen.

Oso ezberdinak dira hango bizimodua eta Zorrotzan zeneukana?

Aitortu behar dut Dublin espainiarrez beteta dagoela eta nire lagunak espainiarrak direla batez ere; beraz, aldaketa badago ere, ez da hainbesterako. Hala ere, hemen benetako independentzia izateko aukera izan dut, baita aurrezteko eta pertsonalki zein laboralki nire burua garatzeko baliagarria izan zait. Gainera, baloratua eta eroso sentitzen naiz lanean eta asialdian plan ezberdinak egiteko eskaintza handiagoa dela sentitzen dut.

Auzora askotan bueltatzen zara?

Ahal dudan bakoitzean bisitan bueltatzen saiatzen naiz, baina nahiko nukeena baino gutxiago. Opor gutxi dut hemen eta bidaiatxoren bat egiteko ere erabili dut aisialdi hori.

Dublinek nire erosotasun-eremutik ateratzeko oso aukera erosoa eman dit

Zeren falta botatzen duzu gehien?

Gezurra esango nuke pintxorik, poteorik, kalimotxorik edo ondo egindako izotzdun kaferik gabe bizitzera ohitzeak bere zailtasunak izan dituela esango ez banu… Hala ere, hemengo gastronomiak ez du hango janariaren inbidiarik. Hala ere, zalantzarik gabe, familia eta lagunak ditut faltan gehien.

Zer da gehien eta gutxien gustatzen zaizuna?

Esango nuke hemen aukera asko daudela, bai lan arloan, bai sozialki. Ez dakit… Hemen giroa desberdina da, beti dago plan ezberdinak egiteko aukera eta jendea. Bilatzen baduzu, noski. Natura eta paisaia asko ere badago esploratzeko, eta hainbat kirol probatzeko aukera ere aurkitu dut. Esan nezake erosotasun-eremutik oso modu erosoan irteteko aukera eskaintzen duela Dublinek, nire esperientziatik, noski.

Bestalde, egia da eguraldia ez dela onena, euria eta zeru lainotsuak nekagarriak izan daitezke eta; baina Bilbon ere antzekoa zen, eta gehiegizko beroa baino nahiago dut klima hau. Hala ere, hemen uste dut euritarako askoz gutxiago prestatuta daudela, azpiegiturari dagokionez, ez dago aterperik ia inon.

Zorrotzara berriro bizitzera bueltatzeko asmoa duzu?

Bai noski!! Irlandan bizitzeari denboraldi baterako deritzot. Egia da hasiera batean pentsatzen nuen baino gehiago luzatzen ari zaidala hau, baina auzora bueltatzeko asmoa buruan daukat beti eta bueltatuko naizela argi daukat; auzoa eta Euskal Herria bihotzean daramatzat eta familia eta kuadrila bertan ditut. Hala ere, momentuz ez daukat presa handirik eta esperientzia hau topera bizi nahi dut. Beraz, etapa bukatu dela sentitzen dudanean, bueltatuko naiz.