CRISTINA ÁLVAREZ: Irrati-esataria eta La Klandestina taldeko abeslaria

«Irrati egiteak harrapatu egiten zaitu»

Cristina Álvarez portugaletetarra da jaiotzez, baina Zorrotzan  bizi da duela ia hogei urtetik hona, gutxi gorabehera irratian eman dituen berberak. Pasio hori lanbide bihurtu da, “irratia egiten hasten zarenean irtetea oso zaila baita, harrapatzen zaituen zerbait delako”. Hainbat irrati-katetan lan egin ondoren, duela bi hilabetetik Radio7 irratiko goizeko magazina gidatzen du. Berarekin hitz egin dugu irratiaz, eta bere beste pasioaz: musikaz. Izan ere, La Klandestina taldeko abeslaria ere bada.

Testua eta argazkiak: AITOR MARÍN

Noiztik zabiltza irratian lanean?

Hit Radion hasi nintzen, Madrilen goiburua eta Estatu osoan sakabanatutako irratiak zituen kate batean. Horietako bat Portugaleten zegoen, bizi nintzen herrian, ni portugaletetarra bainaiz. Karrera amaitu berria nuen eta curriculumak botatzen hasi nintzen hainbat lekutan, itxaropen handirik gabe. Hortik deitu zidaten, eta hor hasi nintzen.

Irratia kazetaritzan aritzeko irteera izan zen ala irrati-esataria zara bokazioz?

Egia esan, nire benetako bokazioa faranduleoa zela uste dut, eta kazetaritza ikasi nuen horri guztiari irteera emateko, kar,kar!… Egia esan, irratia izan zen une jakin bateko lehen aukera. Baina egia da irratiak harrapatu egiten duela, eta behin barruan, ezin da irten.

Otsailetik, Radio7ren goizeko magazineko esataria zara. Gustura? Nola heldu zitzaizun aukera hau?

Egia esan, beti nahi izan nuen lana da. Irrati estilo hau gustatzen zait, lotsagabea, hurbila, (ez bakarrik irratia Lutxanan dagoelako, kar,kar…) Eta Monederok erretiroa hartuko zuela jakin nuenean, irratiko kide batekin hitz egin nuen. Radio7n lan egiteko gogoa nuen, eta irratiak nire profila zuen pertsona bat behar zuen; beraz, dena primeran atera zen.

40 urtez irratiaren goizeko ahotsa izan da Miguel Ángel Monedero. Esatari oso berezi bere estiloagatik, eta entzuleek oso maitatua. Bera ordezkatzeko erronka ez zen erraza, ezta?

Ez, baina ez dut horretan asko pentsatu, egia esan. Monedero duela urte askotatik ezagutzen dut, berezitasun ordezkaezinak dituen kide eta laguna da. Estilo desberdinak ditugu, eta, beraz, ez dago konparaziorako aukerarik.

Gaur egungo lanera iritsi aurretik, Onda Vascan ere izan zinen. Hala da?

Bai. 2017ko udaz geroztik, ia urtero egin dut lan Onda Vascan, bajak edota ordezkapenak egiten, edo nirekin kontatu nahi izan duten edozein gauzatan. Eta lanik gabe egon naizenean, irratiarekiko lotura zuten gauzak egin ditut etxean, irrati xumeentzako edo ekoiztetxeentzako kuñak grabatzen, adibidez.

Gainera, iragarki eta irratirako eduki askoren ahotsa zara. Irrati-ahotsa jaio ala egin egiten da? Ez dut lokuzioa ikasi, baina egia da ez dudala hasi nintzen unean neukan ahots bera… Uste dut denborarekin, lanbide guztietan bezala, eguneroko lanak hobetzen gaituela.

Radio7n lan egiteko gogoa nuen, eta irratiak nire profila zuen pertsona bat behar zuen; beraz, dena primeran atera zen

Hainbeste urteko ibilbidean bizipen ugari izango dituzu, baina zerbait nabarmendu beharko bazenu, zein izango litzateke?

Bada, jende zoragarri asko elkarrizketatzeko eta ezagutzeko aukera izan dut, eta asko ikasarazi didate. Nire bizitzan ekarpen handia egin didan jende anonimoa, eta ospetsua ere bai. Azken horien artean: Guillermo Toledo, Alberto San Juan, Shakira, Pablo Motos, El Canto del Loco…

Telebistan edo prentsa idatzian lan egin duzu edo lan egin nahiko zenuke?

Zerbait egin dut ikasten ari nintzela… Besteak beste, karrerako azken urteko praktikak, telebistan, Tele7-n. Hilabete batzuk eman nituen han. Eta orain irratian egiten dudan lanarekin paraleloa den ikus-entzunezko proiektu batean ere sartuta nago. Euskal Herriko ibaien iturburuei buruzko dokumentalak hain zuzen.

Dokumental horien aurkezlea zara. Konta iezaguzu horretaz gehiago.

RitxarGP ikus-entzunezko ekoizleak Euskal Herriko ibaien iturburuei buruzko edukiak egitea zuen helburu. Kontaktu komun baten bidez konektatu eta proiektuarekin bat egitea proposatu zidanean, onartu egin nuen. Eta elkarrizketak egiteaz gain eta proiektu honetarako ibai-ertzetan kapituluak filmatzeaz gain, jende eta leku ikusgarriak ezagutzen ari naiz eta naturan oso lan atsegina egiten ari naiz.

Proiektuari berari dagokionez, webgune bat dugu, nacederos.eus, eta, bertan, online plataforma bat jartzen dugu jendearen eskura, hainbat kapitulu, blog bat eta podcastak argitaratuta. Lehen denboraldia, esan dudan bezala, Nerbioi ibaiari buruzkoa da, eta Itziar Ituñorekin hitz egin dugu, adibidez. Proiektu honen amabitxi modukoa izan da Itziar eta babes handia eman digu. Basauriko ibaiari buruzko oroitzapenak kontatzen ditu Ituñok, eta ibaian gora jarraituta, elkarrizketa interesgarri eta irudi eder gehiagorekin osatzen da kapitulua, Nerbioi ibaiaren iturburura iritsi arte. Lehenengo denboraldia argitaratu berri dugu, eta bigarrena grabatzen ari gara, Isoria ibaiari buruzkoa.

Musikan ere aritzen zara. La Klandestina orkestrako abeslaria zara. Auzokan entseatzen duen berbena talde bat da, eta behin baino gehiagotan Zorrotzako jaietan aritu zarete. Noiztik zaude La Klandestinan?

Abestea betidanik egin nahi nuen baina egitera ausartzen ez nintzen zerbait izan zen. Nire anaiak musikariak dira, eta egun batean entseatzen duten lokaletan emakumezko abeslari baten bila zebilen talde baten kartela zegoela esan zidaten. Orduan animatu nintzen. Eta dagoeneko, zazpi urte daramatzagu Zorrotzako jaietan, tabernetan eta hainbat lekutan… abesten. Udako denboraldian jarduera handia dugu. Eta “jarduera” diot, hau ez baita lan bat. Musika-elkarte bat gara. Zerbitzu bat ematen dugu jendeak ondo pasatzeko asmoarekin, eta guk ere asko disfrutatzen dugu.

Gutxi balitz bezala, beste proiektu musikal bat duzu, CosmicBears, pop eta rock bertsioen duo bat, non abesteaz gain gitarra ere jotzen duzun…

Bai. Duela urte asko hasi nintzen gitarra jotzen, pixka bat amorrazioz, ez bainintzen kantatzera ausartzen… Utzi egin nuen, harik eta abesten hastean gitarrari euskarri gisa heldu nion arte. Nik ez dut konposatzen, bertsioak baino ez ditut egiten. Proiektu honetan gustuko ditugun abestien bertsio elektroakustikoak egiten ditugu. Nolanahi ere, honetan ere plazeragatik eta gogobetetzen gaituelako jotzen dugu. Inola ere ez dirua irabazteagatik.

Denbora libre askorik ez duzu izango… Ba al duzu beste proiekturik buruan oraindik?

Eguna ez zait ezertara iristen, bai… Baina bada buruan aspaldidanik daukadan proiektua. Auzoan irrati bat sortzea gustatuko litzaidake, esateko zerbait duen ororen ahots bihurtzeaz gain, hainbat kolektibori, ume eta gazteei, behartsuei, adinekoei… balioak emateko tresna izan litekeena. Denek izan dezatela irratia ezagutzeko aukera, eta irrati horrek balio dezala beren mezuak transmititzeko eta guztiona eta guztiontzat bihurtzeko. Izugarri litzateke hori aurrera eraman ahal izatea.